Nan Mèkredi 17 dawout 2022, Depatman Sekirite Nasyonal Etazini (HSI) nan yon konferans pou laprès ki te fèt nan Miami anonse plizyè mezi ki gen pou pran pou sispann trafik zam ant Etazini ak Ayiti ki ogmante, epi tou pwofite montre yon seri zam ki te gen pou antre nan peyi Dayiti, men yo te rive sezi.
Anthony Salisbury ajan espesyal ki responsab envestigasyon Depatman Sekirite Nasyonal nan Miami fè konnen : “Nou konstate yon gwo ogmantasyon nan trafik zam ilegal ant Etazini ak Ayiti“.
Yon lòt kote ajan fè konnen se pa sèlman trafik zam lan ki ogmante, li fè konnen tou kalib zam sa yo chanje. Pami zam otorite Ameriken yo sezi te genyen mitrayèt ak zam pou Esnaypè, sa ki ta vle di gen pi gwo zam ki antre nan trafik ki fèt nan direksyon peyi Dayiti. Zam sa yo gen kapasite pou yo koze anpil dega, daprè sa ajan Anthony te fè konnen.
Ajan Anthony ki te pran lapawòl nan konferans sa fè konnen HSI, lapolis peyi Etazini ak minis Jistis la ak kèk lòt kòlèg ap suiv dosye sa pi prè epi ap fè tout jefò ki posib pou konbat trafik zam nan karayib la, sitou pou peyi Dayiti.
Otorite Ameriken yo fè konnen pou konbat trafik zam lan yo pral enspekte tout kago ak koli moun voye tou nan avyon pou peyi Dayiti. Anplis, otorite yo fè konnen yo pral mete tout mwayen yo gen nan men yo pou identifye epi sezi zam, pyès pou zam ak minisyon ki gen pou rive nan karayib la ak Ayiti.
Atik sa se pwopriyete prive ©️ Gwoup Medya MAGHAITI 2022
World
Discussion about this post