Nan yon nòt pou laprès yo pibliye jodi madi 10 desanm 2024 la, Ofis Pwoteksyon Sitwayen (OPC) di li kondane atak gang Mikanò fè sou granmoun sòti 60 pou rive 80 lane nan zòn Waf Jeremi. Selon yo menm, zak sa ki fèt avan 76yèm selebrasyon deklarasyon inivèsèl dwa moun nan se yon vyolasyon li ye sitou pou diyite moun an jeneral.
«Zak sa y ap eseye jistifye ak move kwayans ki pa menm fonde a se yon vyolasyon dwa moun li ye, sitou sa rive fèt kèk tan avan selebrasyon 76yèm deklarasyon inivèsèl dwa moun», daprè sa ki ekri nan nòt sa a.
Pi lwen, OPC raple tout moun akizasyon lougawou yo fè sou moun yo pa dwe jistifye zak vyolans ak egzekisyon ki fèt yo. Paske yo soulinye, granmoun yo merite tout respè ak pwoteksyon.
Fas ak nivo vyolans sa a, òganis k ap defann dwa moun yo mande pou otorite jidisyè ak polisyè yo aji prese prese pou idantifye epi trennen responsab yo devan lajistis. Nan menm sans lan, yo mande tou pou kominote entènasyonal la voye je sou sitiyasyon Ayiti a yon fason pou kapab fè jefò pou tabli lòd epi pwoteje dwa sitwayen yo.
N ap fè konnen, aprè atak sa divès estrikti k ap defann dwa moun leve vwa yo kont sitiyasyon sa. Etazini, Kanada ak Lafrans se pami gwo peyi ki yo menm tou kondane masak sa ki lakoz lanmò anviwon 184 granmoun ak kèk jèn ki te vle anpeche zak sa fèt.
CP: Ananias Pierre
Atik sa se pwopriyete prive ©️ Gwoup Medya MAGHAITI 2024
