Nan yon lis Immigration and Customs Enforcement (ICE) te mete deyò nan dat 24 novanm 2024 la, nou jwenn genyen yon total 1 445 549 moun Etazini deside voye tounen lakay yo. Chif moun sa yo konsène plis pase 100 peyi. E lis sa ki la depi sou administrasyon Biden nan genyen 10 peyi, pami yo Ayiti, ki gen plis migran y ap gen pou voye tounen lakay yo.
Nan yon premye tan, nou jwenn Onndiras ki li menm genyen 261 651 migran k ap gen pou pase anba seri depòtasyon administrasyon Trump lan. Aprè sa, nou jwenn Gwatemala ki ak 253 413 moun, Meksik gen yon total 252 044 migran.
Nikaragwa, Kiba, Brezil ak Lachin se 4 peyi sa yo nou jwenn aprè sa ki genyen plis moun ki sou lis Etazini ap depòte yo. Chak peyi sa yo genyen youn aprè lòt 45 995; 42 084; 38 677 ak 37 908 migran otorite amerikèn yo vize.
Ayiti li menm ki okipe 8yèm plas la, genyen yon total 32 362 moun nan lis ICE a. Ekwatè vini aprè l avèk 31 252 migran epi Kolonbi an dènye pozisyon ak 27 388 moun.
Fòk nou soulinye, lis sa ICE te rann piblik nan mwa novanm 2024 la ap toujou sèvi sou administrasyon Trump lan. E l ap pèmèt ajan yo pran migran yo ap gen pou yo depòte yo.
Credit Photo: ABC News
Atik sa se pwopriyete prive ©️ Gwoup Medya MAGHAITI 2025
