Nan yon nòt pou laprès li pibliye jodi lendi 28 oktòb 2024 la, Òganizasyon Sitwayen pou yon Nouvèl Ayiti (OCNH) denonse atak popilasyon Dèlma 24 la sitou Solino sibi anba gang ak zam nan kowalisyon Viv ansanm fè pandan semèn sa yo.
Mete sou gang yo li lonje dwèt sou yo, OCNH di li denonse ak tout fòs li tou tolerans ak silans Leta fè devan ensekirite a k ap monte nan peyi a. Epi ki lakoz gwo vyolasyon dwa moun.
«Malgre Leta ayisyen gen yon obligasyon pou garanti sekirite sitwayen li yo, li enkyetan pou n konstate ensekirite a ap bat nan prèske tout zòn nan rejyon metwopolitèn Pòtoprens lan. Lokalite sa yo ki te gen lapè, vin tounen fòs gwoup ame ki teworize popilasyon an nan tout nivo san okenn konsiderasyon», se sa nou li nan nòt la.
Òganizasyon an revele nan yon ankèt li mennen nan Polis Nasyonal Ayiti a (PNH), ekipman yo bay enstitisyon sa nan kad misyon l genyen pou l mete lòd sanble pa menm apwopriye pou operasyon yo. Pandan li fè kwè gouvènman an plis sanble teyorik olye l pratik li denonse pratik sa a puiske selon li menm, leta pa bay lapolis la sipò ki nesesè pou li fè misyon sekirite li yo.
Estrikti dwa moun nan ki montre li preyokipe fas ak kalamite popilasyon Solino an ap viv la, raple Leta ayisyen obligasyon nasyonal ak entènasyonal li genyen nan zafè sekirite piblik. «Retabli yon klima sekiritè dwe pami priyorite gouvènman tranzisyon an, men sanble pa gen okenn efò konkrè ki fèt pou retabli otorite leta a», se sa OCNH di.
Òganis dwa moun na di l rekonèt jefò ajan PNH yo fè pou evite sa pi mal nan zòn tankou Solino, Akayè ak Kanaan. Se sa k fè, li mande Leta ayisyen pou l pran tout dispozisyon ki nesesè e prese prese pou ranfòse kapasite lapolis la ak Fòs Lame Ayiti a (FAD’H) nan ba yo ekipman ki adapte pou kapab mare bandi. Sa ki daprè yo, kapab yon demach pou tabli sekirite nan peyi a.
Pou fini, OCNH fè konnen nan moman Ayiti ye la, se pa pou diskou oswa obsèvasyon ki dwe ap fèt ankò. Men, se pou aksyon kòmanse poze, paske sitiyasyon an depase twòp.
Atik sa se pwopriyete prive ©️ Gwoup Medya MAGHAITI 2024
