Nan yon kominike li rann piblik jodi dimanch premye septanm 2024 la, Misyon sekirite ak soutyen (MSS) an enfòme li menm ap Polis Nasyonal Ayiti (PNH) a ap mennen plizyè operasyon nan Bèlè, Solino ak zòn ki tou pre l yo.
Operasyon sa yo se yon mannyè pou rive retire gang sa yo epi pèmèt zòn sa yo vin nòmal.
Godfrey Otunge, kòmandan ki responsab MSS la nan nòt sa fè konnen operasyon pou kontrekare ak elimine aktivite gang nan tout peyi a ap pran fòm. Li soulinye tou se ap yon pwosesis ak yon vwayaj ki mande pou tout moun mache ansanm.
Ofisye Kenya a di l kwè sa ap pèmèt yo reyalize objektif ak menm vizyon yo te prevwa nan rezolisyon 2699 Konsèy Sekirite Nasyonzini an.
«Ajan nou yo rete fidèl ak manda yo epi yo respekte lwa entènasyonal sou dwa moun, jan sa endike nan règleman sou dilijans dwa moun yo. Sa a montre sekirite sivil yo rete priyorite nimewo 1 nou», se ki ekri nan nòt la.
Responsab MSS la yon lòt kote mete aksan sou jan operasyon yo ap gen pou fèt. Li di yo ap gen pou fèt sou lanmè, sou tè ak anlè, sitou pou netwaye wout ak lari pou pèmèt moun sikile nòmal ak machin yo tou.
Pi lwen, li soulinye operasyon sekirite yo pral fèt wout an wout, lari an lari ak kay an kay, san yo pa kite plas pou gang. Pandantan sa, li mande gang yo pou yo depoze zam yo epi rann tèt yo bay gouvènman an pou fè fas ak règ lalwa.
Atik sa se pwopriyete prive ©️ Gwoup Medya MAGHAITI 2024
