Nan yon kominike yo sòti nan ayè mèkredi 13 novanm 2024 la, Medsen San Fwontyè (MSF) denonse move zak lapolis fè sou yo dèske yo touye 2 pasyan pou yo 11 novanm pase a. Epi yon lòt kote, yo kondane zak vyolans menm ajan fòs lòd sa yo te fè sou pèsonèl sante yo ki te ap pran swen malad sa yo nan yon anbilans yo.
«Pandan yo rive gen kèk polisye ak manm brigad ki te ansèkle anbilans lan, yo plat kawotchou yo epi voye gaz lakrimojèn anndan machin nan pou kapab fòse manm ekip la sòti. Aprèsa yo mennen blese yo deyò lopital la epi touye pou pi piti 2 ladan yo», daprè sa nou li nan kominike MSF la.
Anplis sa, yo eksplike avan menm polisye yo te rive touye pasyan sa yo se depi bò lopital MSF genyen nan Dwouya a yo te kanpe anbilans lan, nan lide pou te arete yo aprè yo te fin tire anlè. Yo presize tou, nan machin nan te genyen 3 jèn ki te pran bal, kote yo menm yo t ap prese pou te ale ak yo nan lopital lapè a ki chita kò li nan Dèlma 33.
Mete sou kote zak sa yo fè sou pasyan yo, MSF denonse tou fason ajan polis sa yo te aji ak manm ekip yo a ki te nan anbilans lan. «Yo joure yo, ba yo gaz, menase yo epi kenbe yo kont volonte yo pandan plis pase 4è».
Nan sikonstans sa, chèf misyon an ki se Christophe Garnier deklare ekip yo genyen yo bezwen bon jan sekirite pou kapab kontinye bay popilasyon ayisyèn nan bon jan laswenyay.
Se pou sa, ekip Medsen San Fwontyè a mande tout moun an jeneral respekte dwa kèlkeswa moun nan genyen pou l ka jwenn swen medikal san diskriminasyon ak blokaj. Nan menm kad sa, yo plede tou pou pasyan yo, pèsonèl medikal yo, ansanm ak lòt estrikti ki bay swen yo pou jwenn bon jan sekirite sitou nan moman vyolans lan pa sispann monte nan sosyete a.
N ap soulinye, se pa premye fwa ka vyolans sa yo repete ak lapolis. Madi ki te 3 septanm pase a, yon sitiyasyon konsa te prezante kote MSF te fè konnen lapolis te lakoz yon pasyan yo mouri san jwenn swen akòz yo te bloke wout yo.
Atik sa se pwopriyete prive ©️ Gwoup Medya MAGHAITI 2024
