Nan yon kominike li pibliye jodi madi 19 novanm 2024 la, Medsen San Fwontyè (MSF) anonse li sispann tout aktivite medikal li yo nan Pòtoprens ak zòn sou kote li yo. Responsab yo di yo pran desizyon sa se pa rapò ak divès atak epi menas ekip yo sibi anba men lapolis.
«Aprè menas grav plizyè manm fòs polis ayisyen an fè kont pèsonèl MSF la, nou deside kanpe sou tout aktivite nou yo nan Pòtoprens», se sa nou li nan kominike sa a. An menm tan, li presize poko gen okenn dat pou yo ta rekòmanse ak aktivite medikal yo konn fè yo.
Pou kore desizyon yo pran an, òganis ki ap bay laswenyay nan peyi a depi plis pase 30 lane soulinye plizyè atak ak menas ekip yo te sibi pandan sèlman mwa novanm nan. Pami yo, yo site : 12 novanm kote plizyè manm brigad rechèch ak entèvansyon nan lapolis la te fè gwo menas lanmò sou pèsonèl yo pou jou k ap vini yo, 16 novanm kote plizyè polisye ki pa t ak inifòm te fè vyolans vèbal sou yon chofè yo, 17 ak 18 novanm 2024 la yo di te gen gwo menas pou te touye yon pasyan yo epi yon polisye nan Kafou Rita te anonse yo lapolis pral kòmanse touye epi mete dife sou kèlkeswa moun ki anba kontwòl MSF la.
Se akoz tout aksyon sa yo ki lakoz chèf misyon yo a Christophe Garnier deklare : « Nou paka kontinye operasyon nou yo nan yon anviwonman kote pèsonèl nou riske viktim atak, vyòl osnon riske mouri ». Mete sou sa, li fè konprann sèl bagay ki ka fè yo reprann aktivite yo se pou yo ta jwenn garanti y ap jwenn sekirite ak bon jan respè pou misyon medikal ak imanitè yo.
Pou kounye a, MSF fè konnen se sèlman pasyan ki te deja nan lopital li yo k ap kontinye resevwa swen. Mete sou sa aktivite klinik mobil nan rejyon metwopolitèn nan epi sante matènèl ki genyen nan depatman Sid, Pòtapiman ap toujou kontinye tou.
Atik sa se pwopriyete prive ©️ Gwoup Medya MAGHAITI 2024
