Nan yon kominike yo pibliye jodi mèkredi 11 desanm 2024, Medsen San Fwontyè (MSF) anonse li ap reprann kèk nan sèvis li yo nan rejyon metwopolitèn nan. Selon sa yo ekri, yo fè konnen desizyon pou te kanpe aktivite yo te fè yo lapèn paske anpil moun pa t gen aksè jwenn swen alòske yo te bezwen sa.
«22 jou aprè li te kanpe akoz menas ak vyolans dirèk ki plede fèt sou pèsonèl ak pasyan li yo. Medsen San Fwontyè (MSF) ap anonse l ap reprann yon pati nan aktivite medikal li yo nan rejyon metwopolitèn Pòtoprens lan», daprè sa yo ekri nan kominike a.
Pi lwen, yo soulinye se pa t yon desizyon fasil ditou lè yo konnen plizyè pasyan te nan nesesite pou jwenn swen. Men, yo kontinye pou di yo te oblije fè sa akoz atak vyolans pèsonèl yo ak ekip yo konn ap sibi yo.
Sant Twomatoloji ak gwo boule nan Taba, lopital Dwouya, Sant MSF pou blese nan Kafou a, sèvis wash nan kan deplase yo, Matènite Isaïe Jeanty (Chansrèl), se kote aktivite yo ap reprann yo. Poutan, sèvis pou mennen pasyan lopital nan anbilans, ak aktivite nan sant Tijo a yo presize yo poko ap reprann akoz sitiyasyon sekiritè a.
«Nou mande pou tout pati ki konsène yo respekte misyon medikal ak imanitè nou an pou nou kapab kontinye reponn ak bezwen medikal yo jan nou kapab», se deklarasyon chèf misyon an Jean-Marc Biquet ki di yo gen gwo dout sou jan yo pral kontinye. Puiske, li estime toujou gen gwo danje pou sekirite yo malgre tout angajman yo.
Atik sa se pwopriyete prive ©️ Gwoup Medya MAGHAITI 2024
