Divès moun ki t ap viv Solino ki te kouri pou chape anba zak vyolans bandi nan kowalisyon Viv Ansanm te vin devan laprès ayè jedi 13 fevriye 2025 lan, pou mande otorite nan leta a kreye kondisyon sekiritè pou yo tounen lakay yo.
Aprè yo fin pase 3 mwa nan lokal Ofis Pwoteksyon Sitwayen (OPC), kèk nan moun sa yo pa kache kòlè yo kont dirijan yo. Moun sa yo ki fè konnen yo t ap viv byen, deklare yo pase 3 mwa tray ak mizè pandan yo pa lakay yo a.
Youn nan abitan Solino yo denonse move kondisyon l ap viv depi lè l kouri kite lakay li a. Daprè sa l di, menm dlo yo paka jwenn nan espas kote yo ye a pou yo sèvi.
Yon lòt kote, pwotestatè yo leve vwa yo pou di yo bezwen tounen lakay yo paske kondisyon y ap viv la pa bon ditou. Kèk nan yo fè kwè, yo paka al vann epi se ak anpil difikilte pou yo manje pandan moun ki rete tou prè biwo OPC a fè konnen yo vin sa l zòn yo.
Nan menm mouvman pou eksprime kòlè yo fas ak sitiyasyon malouk yo ap viv depi dènye atak bandi yo fè nan Solino a, youn nan abitan yo lonje dwèt sou otorite yo kòm responsab sa ki rive a. Pou li menm, se leta ayisyen ki bay bandi yo bal ak zam pou fè popilasyon an kouri kite kay li.
Sitwayen sa yo deklare y ap dòmi sou frata nan Boudon, e pa sispann akize responsab yo nan leta a. Yo revele yo nan gwo difikilte pou dòmi lè lapli tonbe. Nan sans sa, yo mande ak manm Konsèy Prezidansyèl la pou mete gang yo deyò nan Solino.
Abitan Solino yo pwofite menm mouvman sa pou pale ak reponsab yo nan Òganizasyon Entènasyonal Migrasyon an (OIM) ki sanble ta gen plan pou leve yo. Yo fè konnen yo pap pran 10 000 goud ajans lan ta swete bay chak grenn moun yo, paske daprè yo yon chanm kay pa lwe nan pri sa. Yo mande ak responsab òganizasyon an si tout bon yo ta gen plan pou leve yo, se pou yo al peye yon kay ansanm ak yo.
Atik sa se pwopriyete prive ©️ Gwoup Medya MAGHAITI 2025
