Nan yon mesaj yo pataje sou kont X yo Misyon Miltinasyonal Soutyen an (MMS) fè pèp ayisyen an pwomès y ap resi fete nwèl nan lapè ane sa. Yo fè deklarasyon sa nan yon kontèks kote popilasyon an pa sispann kouri anba bal bandi nan Pòtoprens lan.
« MSS ap fè efò pou asire pou yon fwa, Ayisyen ap jwi fèt Nwèl yo nan lapè », se sa yo anonse nan mesaj yo a. Pandantan sa, yo mande èd tout Ayisyen ki gen bon jan volonte pou kapab kontinye sipòte epi ranfòse fòs la ak lapolis nan batay kont bandi y ap mennen an.
Anplis pwomès sa, MMS la te pwofite voye yon mesaj klè bay tout manm gang ak moun ki rele tèt yo lidè yo. « Nou vin pou yo », daprè sa nou li.
Yo kontinye pou di : «Nou pral fè yo sòti nan anklav yo ak kote yo kache, epi nou pral asire nou yo arete. Tan yo tou senpleman ap fini. Nou angaje pou Ayiti rekomanse viv ».
Fòk nou di, pandan fòs la ap fè lwanj kote popilasyon an nan Ponsonde te rive pile komisarya zòn nan, e te menm rive fete fèt Gede premye ak 2 novanm pase a, nan Pòtoprens lan bandi pa sispann boule kay moun. Nan atak yo fè yo, yo menm rive mete deyò 10 056 nan Taba, Dèlma ak Pòtoprens daprè chif Òganizasyon Migrasyon Entènasyonal (OIM) te pibliye jedi 24 oktòb 2024 la.
Atik sa se pwopriyete prive © Gwoup Medya MAGHAITI 2024
