Ministè Sante Piblik ak Popilasyon (MSPP) nan yon nòt ofisyèl li pibliye di li kondane ak tout fòs li dife kriminèl sa ki ravaje lokal lopital jeneral la ayè jedi 13 fevriye 2025 lan.
Lopital sa daprè sa l di, se yon referans ki rete yon poto mitan nan sistèm sante nasyonal la menm lè depi kèk tan li fèmen akoz fenomèn ensekirite a.
Otorite lasante yo nan peyi a ki sanble preyokipe ak aksyon bandi yo poze nan lokal lopital la, deklare se yon zak vandalis pyès moun pa dwe aksepte sou eritaj sante peyi a. Yo kwè tou, sa ki rive a mete plis an danje aksè pou popilasyon an jwenn swen. «Detwi enfraestrikti sante se yon atak sou dwa fondamantal pou lavi ak diyite moun», se sa yo soulinye nan nòt la.
Aprè zak sa ki fè plizyè pati tankou sal òtopedi, sal achiv ak chiriji a pase anba flanm dife, MSPP mande otorite konpetan yo pou yo adopte tout mezi ki nesesè yo. Li di l kontinye pran angajman l nan travay san pran souf pou asire aksè a swen pou tout popilasyon an.
N ap raple nan dat 24 desanm 2024 la, ansyen minis sante a doktè Duckenson Lorthe Blema te fè tantativ pou ouvè pi gwo lopital peyi a e sa te tounen an masak kote gang Viv ansanm yo te atake espas la epi retire lavi 2 jounalis ak yon polisye.
Atik sa se pwopriyete prive ©️ Gwoup Medya MAGHAITI 2025
