Aprè kandida pati Repibliken an, Donald Trump fin itilize yon fo enfòmasyon kont Ayisyen k ap viv nan vil Springfield nan Ohio pou fè kanpay politik li, Ministè Ayisyen k ap viv aletranje (MHAVE) yo eksprime enkyetid li pou seri deklarasyon sa yo. Selon yo menm se yon deklarasyon k ap diskrimine dyaspora ayisyen an Etazini.
Nan yon nòt ki pote dat 10 septanm 2024 la, MHAVE fè konnen jan li preyokipe akoz deklarasyon rasis sèten politisyen ameriken fè kont Ayisyen nan dyaspora a, sitou sila yo ki nan eta nou sot site yo.
«Malerezman, se pa premye fwa konpatriyòt nou yo lòtbò dlo ap viktim kanpay manti ak fo
enfòmasyon ki vize demounize yo pou enterè politik. Yon lòt fwa ankò, se pou nou menm Ayisyen kanpe ansanm pou di avèk yon sèl vwa, nou se moun», se sa ministè a ekri yon fason pou denonse move kanpay sa k ap fèt kont Ayisyen yo.
Nan nòt la, ministè a fè konnen minis yo a, Dominique Dupuy te chita jou ki te madi 10 septanm nan, ak plis pase 50 lidè kominotè, relijye ak responsab òganizasyon ki travay ak migran nan zòn sa yo ak nan lòt kote Etazini.
Li eksplike tou, rankont vityèl la ki te gen ladan l konseye Premye minis tranzisyon an, doktè Nikita Séjour te fèt nan lide pou manifeste solidarite yo ak kominote ki afekte ak move pawòl sa yo. Nan rankont sa, yo soulinye yo te defini ansanm repons ki adapte ak atak sa yo.
Pii lwen, responsab ministè a di li pa sèlman vle pote solidarite l, men tou li vle voye yon sinyal klè kote l voye jete ak tout fòs li move deklarasyon sa yo. Pawòl sa yo, daprè sa yo di atake diyite konpatriyòt ayisyen yo, e menm mete lavi yo an danje.
Nan sans sa, yo pwomèt yo ap evalye ak òganizasyon yo ki nan dyaspora a tout estrateji posib pou ede konpatriyòt nou yo ki viktim zak entimidasyon ak estigmatizasyon sa nan vil Springfield. Menm bagay la ap fèt tou lòt kote sa ta fèt e moun sa yo ap jwenn pwoteksyon otorite konpetan yo.
Yon lòt kote, MHAVE ankouraje tout inisyativ legal ki fèt pou defann dwa migran ayisyen yo. Pandan l fè konnen ak misyon diplomatik ak konsilè yo l ap deplwaye yon mekanis pou soutni epi sipòte Ayisyen nan dyaspora a, kèlleswa kote yo ye.
N ap raple, depi plizyè jou plizyè pèsonalite politik pa sispann pataje enfòmasyon sa a ki ta fè kwè migran ayisyen nan Etazini ap volè chat, zwa ak kana ameriken yo pou yo manje. Politisyen sa yo twouve yo nan kan Repibliken an, ladan yo nou jwenn ansyen prezidan ameriken an, Donald Trump, vis prezidan li nonmen an, ki se senatè vil Ohio, James David Vance, epi genyen tou mèt rezo sosyo ki rele X la, Elon Musk.
Fòk nou di, jouskaprezan se yon enfòmasyon otorite minisipal yo ak medya lokal nan vil Springfield yo pa sispann demanti, puiske yo deklare yo pa jwenn okenn plent konsa. Malgre sa, nan demach politik li Donald Trump sot soulinye nan lannuit madi 10 septanm 2024 la, enfòmasyon sa a nan premye deba prezidansyèl fas ak vis prezidan Kamala Harris, medya ABC News li menm te òganize nan Pennsylvanie.
Atik sa se pwopriyete prive ©️ Gwoup Medya MAGHAITI 2024
