Nan yon kominike ki gen dat 31 jiyè 2024 la, minis Jistis la, mèt Carlos Hercule mande ak komisè gouvènman yo ansanm ak ranplasan yo pou yo kanpe sou grèv yo tanmen an.
Nan lide pou mande touche menm lajan epi jwenn menm benefis sosyal ak majistra kanpe yo, komisè gouvènman ak ranplasan yo gen plis pase yon mwa depi tanmen yon grèv nan tout tribinal premyè enstans ak tribinal lapè nan Repiblik la. Nan sans sa, pou rive jere pi byen eta ijans sekiritè ki deklare depi 17 jiyè sou 2 depatman nan peyi a, minis jistis la bay lòd pou aktè sa yo mete bout ak grèv yo a.
Nan kominike sa, nimewo 1 Ministè Jistis ak Sekirite Piblik la raple jan peyi a nan yon sitiyasyon kritik, ki vle di li mande yon repons rapid epi ki byen òganize. Se pou sa, Mèt Carlos Hercule pwofite pou l fè konnen anons sa a se sitou yon avètisman pou konsène yo.
Yon lòt kote, minis Jistis lan raple atik 55 lwa 20 novanm 2007 la ki di Jij ak ofisye komisè piblik yo kapab òganize tèt yo pou fè pase revandikasyon yo, san manifestasyon yo pa afekte sèvis piblik jistis la. «Nenpòt aksyon konsète ki gen pou lide anpeche travay lajistis oswa ki gen efè restriksyon sou dwa ak libète sitwayen yo entèdi», se sa nou li nan kominike a.
Mèt Carlos Hercule peze sou nesesite ki genyen pou enstitisyon ki nan sistèm jistis la batay pou goumen kont bandi ak krim grav pandan peryòd eta ijans la. Selon otorite yo, aksyon sa ap gen pou dire yon mwa.
Atik sa se pwopriyete prive ©️ Gwoup Medya MAGHAITI 2024
