Nan yon pòs li fè jodi vandredi 13 septanm 2024 la, Minis Zafè etranjè ak Kilt (MAE), Dominique Dupuy anonse li ap fè demach pou batistè peyi a antre Ayiti. Li fè anons sa pandan li twouve li aktyèlman nan Wayòm Ini kote li fè konnen li deja rankontre kèk gwo otorite pou te pale sou dosye ki konsène peyi a.
Pandan li espere pou yon jou kanmenm batistè peyi a resi antre nan patrimwàn ayisyen, minis Dupuy fè konnen jodi a menm li te wè ak je li dokiman sa ki gen tout enpòtans li nan listwa nasyon an.
“Ansanm ak ekip mwen, mwen te vizite Achiv Nasyonal Wayòm Ini a pou mwen wè ak 2 je m, kopi orijinal Ak Endepandans Ayiti a“. Nan sans sa, nimewo 1 nan Ministè zafè etranjè a fè konprann bò kote pa li li deja lanse dyalòg ak otorite britanik yo pou dokiman istorik sa a ka retounen Ayiti yon jou. Puiske, selon li menm li enpòtan anpil pou idantite nou kòm pèp, epi ki reprezante zak nesans kolektif nou an, ka retounen Ayiti yon jou.
Mete sou kote gwo demach sa ki deja ap fèt la, minis Dupuy te pwofite soulinye pandan li sou tè anglè a li te gen gwo rankont ak bawon Jenny Chapman nan Darlington, ki se Minis pou Amerik Latin ak Karayib la. Li soulinye 2 pati yo te diskite sou sekirite, pataj eksperyans nan zafè ransèyman, kriz sante ak eleksyon ki ta dwe genyen nan peyi a.
N ap soulinye, depi aprè pwoklamasyon endepandans peyi a dokiman enpòtan sa pa t twouve l ni nan achiv ni nan patrimwàn Ayiti. Men, nan yon demach pou dokiman sa retounen lakay li, minis la poze aksyon sa ki atire atansyon anpil moun nan sosyete ayisyèn nan.
Atik sa se pwopriyete prive ©️ Gwoup Medya MAGHAITI 2024
