Nan yon lèt louvri pou Pè Franzdy Petit-Homme, meri Petyonvil la mande pou Pè a sispann tout aktivite relijye ki gen gwo rasanbleman nan komin nan. Selon eksplikasyon responsab yo bay, desizyon sa pran akoz ensekirite a ki pa sispann monte nan peyi a.
«Akoz sitiyasyon difisil sa ki gen rapò ak ensekirite ki genyen kounye a nan peyi a, meri a oblije pran kèk mezi pou garanti sekirite sitwayen yo epi evite tout danje pou fidèl yo ak otorite relijye yo», selon sa ki ekri nan lèt sa ki adrese ak Pè Franzdy Petit-Homme ki ap dirije Paroisse Notre Dame Immaculée Conception.
Se sa k fè pi lwen, yo asire otorite ki la pou sa yo aktyèlman ap travay san kanpe yon fason pou tabli lapè ak kè poze nan komin nan.
N ap soulinye, responsab yo nan meri Kenskòf la tou te fè avètisman pa yo. Kote yo fè konnen tout aktivite vizit yo kanpe e yo te menm mande pou chak grenn sitwayen rete veyatif sou kilès y ap kite antre nan zòn yo.
Fòk nou soulinye, nan jou pase yo lapolis ak popilasyon an te touye epi boule anviwon 32 prezime manm gang ki t ap tante anvayi 2 komin sa yo. Pami yo, 28 te jwenn lanmò yo nan Petyonvil, Boudon ak Kanapevè, epi 4 lòt yo te mouri nan komin Kenskòf, espesyalman nan yon zòn ki rele Vya.
Atik sa se pwopriyete prive ©️ Gwoup Medya MAGHAITI 2024
