Nan yon kominike yo mete deyò jodi jedi 5 desanm 2024 la, Meri Okap la anonse tout moun yo dekrete eta ijans anviwonmantal sou tout vil la. Yo eksplike desizyon sa vini aprè konsta yo fè sou dega move tan an fè sou komin sa kote gen gwo inondasyon, deboulonnay tè ak anpil batiman ki gen gwo domaj.
«Komisyon Minisipal Okap la ap enfòme laprès ak popilasyon an li adopte yon arete ki deklare eta ijans anviwònmantal sou tout teritwa komin lan. Desizyon sa a, pran pandan seyans òdinè Konsèy Minisipal la nan dat ki te 3 desanm 2024, se yon desizyon ki enpòtan anpil apre dènye move tan yo», se sa yo fè konprann.
Nan sans sa nan yon bò, administrasyon minisipal la anonse li pral mennen kanpay sansibilizasyon pou enfòme tout sitwayen yo sou mezi ki pran yo ak konpòtman yo dwe genyen. Yon lòt kote, yo avèti tout moun sou sanksyon ki pral pran kont tout moun ki gen konstriksyon ilegal nan zòn malè pandye yo, e se sa ki fè yo pwomèt y ap pran tout dispozisyon pou fè aplike arete a.
«Administrasyon minisipal la lanse yon apèl bay tout aktè lokal yo, patnè nasyonal ak entènasyonal yo, ansanm ak popilasyon an, pou mete men ansanm ak li pou konbat defi anviwònmantal sa a. Kolaborasyon chak moun enpòtan pou pwoteje vil la, retabli kondisyon lavi, epi asire devlopman dirab komin lan», toujou selon responsab yo.
N ap raple, eta ijans sa dekrete sou vil Okap 2 jou aprè lapli fè gen gwo inondasyon nan plizyè zòn nan 2yèm vil peyi a. Sa ki menm te lakoz lanmò yon timoun. Nan depatman Grandans sitiyasyon an pa diferan, paske se menm sikonstans lan moun Jeremi ap viv kote genyen 3 moun ki pèdi lavi yo, 13 blese, 3 lòt disparèt pandan 60 moun oblije kite kay yo pandan pasaj Fwon Fwa a sou tèt Ayiti.
Atik sa se pwopriyete prive ©️ Gwoup Medya MAGHAITI 2024
