Nan yon konferans li te bay sou nominasyon jij Jean Wilner Morin kòm nouvo Pwotektè sitwayen an, ansyen Pwotektè a Renan Hedouville fè konnen moun yo ki anvayi lokal OPC a sou wout Boudon an pa senp ditou. Li deklare nan mikwo laprès, se paske kèk moun te vle konferans près li a pa fèt ki fè sa rive konsa.
«Se yon bagay nou kapab di san rezèv, se yon bagay telegide, se te yon fason pou yo te kapab bòykote konferans près la», se sa Pwotektè sitwayen sòtan an deklare. Li di sa aprè li te fè konprann pami anviwon 300 moun ki anvayi OPC a, se pa sèlman moun ki kouri pou gang ki nan lokal la, men li di chaje lòt tip moun ki okipe espas la.
Yon lòt kote, nan menm konferans sa Me Renan Hedouville di li pap fè yon pa nan pòs li ye a toutotan pa gen yon palman an fonksyon. Selon li menm, se menm pwosesis yo te fè pou te mete l kote l ye a ki pou fèt pou ranplasan li an. Fòk nou di, li te pwofite kritike tou jij Morin ki daprè sa l di pa ta respekte ankò lalwa jan sosyete a te konn pran li an.
Pi lwen, defansè dwa moun nan denonse arete Konsèy Prezidansyèl la epi defann zak sa mete an kesyon endepandans OPC. Tout sa paske li estime pouvwa egzekitif la paka antre nan OPC pou fè chanjman jan l vle. Paske daprè li menm, ògan defans dwa moun nan pa yon ministè.
Se poutèt sa li di : «Nou deja enfòme avoka enstitisyon an ki se Me Patrick Laurent. Tout dispozisyon pran, tout enfòmasyon gentan al jwenn kabinè avoka a, pami yo lalwa òganik enstitisyon an, arete ki te nonmen Pwotektè sitwayen an nan dat ki te 27 oktòb 2017 la ak lòt dokiman pou n ka sezi enstans nasyonal yo ak enstans entènasyonal yo».
Atik sa se pwopriyete prive ©️ Gwoup Medya MAGHAITI 2024
