Nan yon atik jounal New York Times pibliye li rapòte majistra Ohio a, Rob Rue mande pou move ajisman politisyen ameriken yo fini nan vil li a. Li fè deklarasyon sa aprè yon menas bonm ki te genyen nan zòn yo a epi aprè move atak politik k ap plede fèt sou imigran ayisyen yo.
Daprè sa jounal la ekri, majistra a fè konnen vil l ap dirije a ap fè anpil pale pa rapò ak akizasyon Donald J. Trump ak JD Vance te pote sou plizyè milye ayisyen. Se sitiyasyon sa kandida repibliken an te sèvi nan deba prezidansyèl la, kote li te pwofite gaye rimè ki di Ayisyen t ap vòlè bèt ameriken pou te manje yo.
Yon lòt bò, li anonse tou menas bonm ki te fè yo evakye otèl, 2 lekòl ak yon enstalasyon lokal ajans otomobil ayè jedi a se te yon te yon move alèt, endividi yo pa t idantifye te fè nan imel moun yo. E li eksplike se te yon repons rayisab pou imigrasyon nan vil li a.
«Nou vle avanse ansanm, men sa vin pi difisil toujou lè nou ap plede fè fas ak zak vyolans epi menas», se mesaj sa yo Rob Rue deklare nan yon entèvyou li te bay jounal ameriken an ayè jedi 12 septanm nan. Li te kontinye pou di vil li a se èd li bezwen paske yo ap soufri anpil, olye se rayisman ak move pawòl politisyen ak ekstremis pa sispann simaye sou yo.
Pandantan sa, premye sitwayen vil ameriken sa soulinye se depi avan tout pale anpil sa yo vil Springfield te atire atansyon repibliken yo. Puiske li fè konprann, politisyen sa yo te toujou wè vini imigran ayisyen sa yo nan zòn Ohio a se yon echèk pou administrasyon Biden nan.
Majistra Rob Rue kwè se yon fwistrasyon li ye pou yo lè yo wè politisyen yo ap fè manti pou defòme reyalite a. Tandiske, pifò Ayisyen Etazini legal e anpil nan yo te travay nan endistri lokal yo.
Atik sa se pwopriyete prive ©️ Gwoup Medya MAGHAITI 2024
