Aprè plis pase 2 lane sou planifikasyon ki t ap fèt yo, responsab Mèri Wanament yo louvri jodi vandredi 6 oktòb 2023 a mache fwontalye Wanament la. Selon responsab yo, annatandan fwontyè dominiken yo louvri pou yo tanmen diskisyon ant 2 gwoup yo, mache a ap fonksyone chak lendi ak vandredi chak semèn.
“Fas ak sikonstans ki mennen fwontyè a fèmen nan bò pa dominiken yo, nou menm nan Mèri a ak gwoup jesyon k ap dirije mache a pwofite okazyon an tou pou nou tou louvri mache sa pou komèsan pa nou yo kapab fè komès sou fwontyè a nòmalman”, se sa youn nan responsab yo deklare nan kad ouvèti mache a.
Konsa, komèsan ki te al vann pou premye jou sa pa kache kontantman yo pou mache a ki resi louvri. Nan sans sa, yo envite tout komèsan jwenn ak yo pou se pa sèlman dominiken ki pou vann nan bò pa yo a.
Pou sa ki gen pou wè ak fason yon komèsan ap ka jwenn plas nan mache a, responsab yo fè konnen moun sa yo ap gen pou yo kontakte meri a. Konsa yo fè konnen, gen plis pase 1 600 moun ki te gentan nan lis moun ki gen plas yo deja, mete sou sa ki poko jwenn yo.
Pou sa ki gen awè ak jou fonksyonman mache a pou kounya se lendi ak vandredi kote y ap fèmen ak 4trè tapan pou pwosesis netwayaj yo, jou sa yo kenbe konsa annatandan fwontyè a relouvri. Konsa, responsab yo fè konnen y ap tanmen diskisyon ak responsab mache dominiken an pou chak mache yo ka fonksyone nòmalman.
Atik sa se pwopriyete prive ©️ Gwoup Medya MAGHAITI 2023
