Aprè gang fin mete yo deyò lakay yo, zòn refij yo kontinye ap ogmante pi plis nan peyi a. Depi sòti mèkredi pou rive jounen vandredi 15 novanm 2024 la, lekòl Repiblik Ekwatè ki nan Dèlma 33 ak lokal Ofis Pwoteksyon Sitwayen a (OPC) ki sou wout Boudon an se nouvo kote moun sa yo jwenn pou yo rete.
Sak sou tèt, valiz nan do, ti pakèt nan men, kamyonèt k ap bote, se konsa reyalite a ye nan lakou Pòtoprens depi mèkredi 13 novanm nan. Nan deklarasyon yo, kèk nan moun sa yo di yo lage 2 bra balanse nan lari a san anyen pou yo viv ni okenn kote pou yo ale puiske gang yo bare tout wout pwovens yo.
«M gen 62 lane sou tèt mwen se kounye a m ap andire bagay sa yo. Yo boule kay nou nan Solino, nou ta ale Akayè, men nou paka ale paske y ap touye moun la», se kri yon madanm ki twouve l aktyèlman nan lekòl Repiblik Ekwatè a.
Nan yon rapò Òganizasyon Migrasyon Entènasyonal (OIM) te sòti mèkredi 13 novanm nan, yo revele nan sèlman 2 jou (11 -13 novanm) se plis pase 4 372 moun ki te gentan kouri kite kay yo pou bandi. Moun sa yo daprè rapò a, sòti nan divès zòn tankou Dèlma, Pòtoprens, ak Taba.
«3 586 sòti Pòtoprens, 488 sòti nan Taba epi 298 te sòti nan Dèlma. Pifò moun sa yo ki egal ak chif 3 326 al pran refij yo nan 8 sit, kote te gen 6 ki te la deja, epi gen 2 lòt sit ki vin mete sou yo», toujou daprè detay òganis lan bay. Anplis sa, yo soulinye rès moun yo yo menm ki reprezante 24 % nan chif total la, se moun ki jwenn yon fanmi ba yo yon ti kote pou yo dòmi.
Pou kounye a, OIM fè konnen chif moun ki kouri kite kay yo pou bandi yo gen anpil chans pou li plis toujou, puiske jouskounye a chaje moun k ap mawon kite lakay yo.
Atik sa se pwopriyete prive ©️ Gwoup Medya MAGHAITI 2024
