Plizyè zòn nan kapital la leve anba gwo kout bal jodi lendi 11 novanm 2024 la. Sitiyasyon sa ap devlope nan peyi a se aprè anons revokasyon Premye minis Garry Conille, epi aprè nèg ak zam nan gwoup «viv ansanm» yo te anonse kòman yo pral met panik nan peyi a.
Kafou Ayewopò, Dèlma, Vivi Mitchèl se pami zòn ki leve anba bal maten lendi a. Pou kounye a, sikilasyon an paralize pandan divès lekòl fèmen pòt yo.
Fòk nou di, sitiyasyon sa ap fèt se aprè bandi ak zam yo te anonse yo pral mete panik nan peyi a. E tou aprè Konsèy Prezidansyèl Tranzisyon an (KPT) te deside revoke Garry Conille pou ranplase l avèk Alix Didier Fils-Aimé nan yon rezolisyon yo te pran vandredi ki sot pase la.
Malgre tansyon lari a, mesye Alix Didier Fils-Aimé ta dwe enstale kòm nouvo premye minis Ayiti jodi lendi 11 novanm lan menm, daprè sa nou li nan yon envitasyon pou laprès KPT a ki pran lari.
Atik sa se pwopriyete prive © Gwoup Medya MAGHAITI 2024
