Nan yon kominike li pibliye jodi jedi 21 novanm 2024 la, laprimati anonse gouvènman Alix Didier Fils-Aimé a pran mezi pou sekirite plizyè kote nan zòn metwopolitèn nan. Se yon kominike ki vini 2 jou aprè pyès reprezante leta pa t reyaji fas ak monte vyolans lan nan plizyè katye nan Pòtoprens lan.
Nan kominike sa, chèf gouvènman an fè kwè li konprann doulè popilasyon an nan kesyon sekirite k ap ba li pwoblèm nan. Se pou sa, Premye minis Alix Didier Fils-Aimé pwomèt yon lòt fwa ankò volonte li genyen pou debloke tout wout yo.
«Depi enstalasyon gouvènman an, plis jefò fèt pou konbat ensekirite a sou tout fòm», daprè sa laprimati ekri. Pi lwen, yo soulinye aprè gwo reyinyon ijans ki te genyen nan Konsèy Siperyè Polis Nasyonal la (CSPN) ayè mèkredi a gen gwo rezilta yo kòmanse ap jwenn. Sekirite nan nan kèk zòn sansib, distribisyon gaz la ki rekòmanse, asistans pou refijye yo, se pami sa yo site kòm aksyon gouvènman an fè.
Pandan premye minis lan fè konnen l ap kontinye chèche solisyon ak pwoblèm aktyèl yo, li mande pou popilasyon an rete tèt frèt. Se konsa tou, li mande pou chak sitwayen patisipe nan demach lapè tout Ayisyen ap chèche a kote popilasyon sivil la, lapolis ak tout lame Ayiti ap mete devan enterè jeneral la.
© Tous droits réservés – Groupe Média MAGHAITI 2024
