Nan kad yon operasyon inite espesyalize yo nan Polis Nasyonal Ayiti (PNH) tanmen jounen samdi 24 dawout 2024 nan komin Gresye, plizyè prezime bandi mouri anba bal epi 2 zam rive sezi.
Enstitisyon polisyè a ki bay enfòmasyon sila pa t an mezi pou di konbyen bandi ki tonbe nan operasyon sa ki te mennen nan lokalite Jasmen ak Echalòt.
Men, li presize se Inite Taktik Antigang (UTAG) ak Gwoup entèvansyon PNH la ki te fè operasyon an.
Otorite yo nan PNH la soulinye yo pa gen entansyon abandone gwo batay y ap mennen kont gang kriminèl yo. Batay sa daprè sa yo eksplike gen objektif reprann tout zòn bandi ak zam yo okipe yo nan lòd yon fason pou rive mete sekirite ak lapè sou tout teritwa nasyonal la.
Komin Gresye rete youn nan zòn pandan kòmansman ane 2024 sa bandi touye ak fè disparèt pou pi piti 66 moun selon sa dènye rapò Rezo Nasyonal K ap Defann Dwa Moun yo (RNDDH) revele.
Atik sa se pwopriyete prive ©️ Gwoup Medya MAGHAITI 2024
