Lapolis anonse 4 bandi rive jwenn lanmò yo nan lokalite Tibo, komin Milo nan depatman Nò peyi a. Gang sa yo mouri nan echanj kout bal ak fòs lòd yo nan moman yon operasyon yo te tanmen nan lanwit 23 pou louvri 24 septanm pase a nan kad ansasinay direktè rejonyal Ofis Nasyonal Migrasyon (ONM) nan depatman Nò a, Kerwin Augustin ki se, daprè sa sèvis kominikasyon lapolis la fè konnen.
Nan yon konferans pou laprès li bay ayè madi premye oktòb 2024 la, Pòt pawòl adjwen Polis Nasyonal Ayiti (PNH) a, Lionel Lazarre prezante bilan operasyon li fè kont gang k ap teworize popilasyon an nan plizyè depatman nan peyi a. Konsa tou li te pwofite prezante divès mezi yo adopte pou ane eskolè 2024-2025 lan.
Daprè pòt pawòl adjwen PNH la, pami 4 bandi sa yo genyen yon chèf gang ki rele Marcorel ki rive bwè dlo bouch ki. Selon detay li bay, chèf bandi sa t ap dirije yon gwoup gang ki konn fè kidnapin ak plizyè lòt zak ansasinay nan Plèn Nò a ak nan vil Okap.
Pou sa ki gen pou wè ak materyèl, otorite polisyè yo rive sezi yon zam kalib 38, yon zam ki fèt ak pwodwi atizana, 2 kouto, plizyè katouch. Lionel Lazarre soulinye lapolis la mennen operasyon sa a nan kad ankèt k ap fèt sou ansasinay Kerwin Augustin ki se direktè rejonyal Ofis Nasyonal Migrasyon (ONM) nan depatman Nò a. Responsab la te tonbe anba bal bandi 18 septanm pase a e pou kounye a lapolis di li arete 30 endividi nan dosye sa a.
Mete sou sa, Lazarre eksplike Lapolis la te fè yon operasyon nan komin Lenbe nan lokalite Solèy Leve, nan dat 28 septanm 2024 la. Sa ki te bout ak lanmò 2 prezime bandi epi arestasyon 4 lòt endividi, ki selon presizyon responsab la ta nan yon gwoup gang ki rele Lepolis. Pou materyèl yo yo di yo sezi 2 zam ak 2 telefòn.
PNH la, pi lwen pwofite pou l fè konnen nan depatman Sant li arete yon sèten Germain Manion ak James Fortuné. 2 mesye sa yo daprè sa pòt pawòl adjwen an rakonte te sove nan Penitansye Nasyonal aprè atak gang yo nan mwa mas 2024 la. E li fè soulinye tou, Manion se ta youn nan endividi ki ta gen men l tranpe byen fon nan dosye zam legliz Episkopal la.
Pou depatman Latibonit, operasyon ki te fèt 28 septanm nan te lakoz lanmò James Prili nan Gonayiv. Se yon moun Lionel Lazarre di PNH la t ap chache akoz alyans li ak gang Kokorat san ras e kote li patisipe nan plizyè zak malonèt.
Atik sa se pwopriyete prive ©️ Gwoup Medya MAGHAITI 2024
