Direksyon depatmantal Sidès (DDSE) anonse jodi mèkredi 28 dawout 2024 la, li arete Van Camy Weedshy Derosriers pou enplikasyon prezime l nan trafik zam ak bal.
Arestasyon endividi sa fèt nan kad yon kontwòl woutin nan zòn Dumez, komin Jakmèl, mèkredi 7 dawout pase a. Se sa Polis Nasyonal Ayiti (PNH) a fè konnen.
Nan yon repòtaj odyovizyèl, PNH la fè konnen li jwenn foto plizyè zam 556 ak 9 minimèt epi foto pwodwi ki sanble tèt koupe ak marigwana. Li enfòme tou genyen plizyè mesaj vokal sou telefòn sispèk la li voye bay Mackendy ak yon lòt sitwayen ki rele Oscar ki pwouve Van Camy nan trafik zam ak bal.
Bò kote pa l, akize a konfime li te pale ak yon Ayisyen ki sou fwontyè a pou yon Jamayiken. Diskisyon yo daprè sa l di, se yon fason pou l te negosye pou Jamayiken an akoz li pa pale kreyòl.
Van Camy fè konnen negosiyasyon yo t ap sou foto zam ak pwodwi yo ki sanble tèt koupe ak marigwana yo. Kòm rekonpans etranje an t ap bal marigwana.
Lapolis nan Sidès di li transfere endividi a, ki se yon ajan sekirite nan Direksyon Santral Polis Jidisyè (DCPJ), pou l kontinye reponn kesyon.
Atik sa se pwopriyete prive ©️ Gwoup Medya MAGHAITI 2024
