Sèvis Depatmantal Polis Jidisyè (SDPJ) nan Sidès arete nan lannwit samdi 2 novanm 2024 la, Danecie Lafalaise pou zak ansasinay li te fè sou mari l Jean Nego premye novanm pase a.
Ajan polis nasyonal yo rive arete akize a nan Mòn kle, yon lokalite nan Jakmèl. Arestasyon l fèt yon jou aprè l te fin touye ak yon kout kouto jèn gason 28 lane a.
Danecie Lafalaise genyen sèlman 21 lane, nan deklarasyon li yo li rekonèt se li menm menm ki touye mari l. Daprè sa l fè lapolis konnen, se yon zak li rive fè san li pa t gen sa nan lide l vre puiske li eksplike sa pase se pandan li menm ak mari li te nan diskisyon.
N ap raple, 2 moun sa yo te gen yon lane maryaj e menm gen yon timoun ansanm. Aprè madanm nan te fin ponyade l bò kou, Jean Nego te al rann dènye souf li sou kabann lopital Sen Michèl nan Jakmèl.
Atik sa se pwopriyete prive ©️ Gwoup Medya MAGHAITI 2024
