Edson Arisma, se non endividi sa sèvis kominikasyon Polis Nasyonal Ayiti a (PNH) di ki jwenn arestasyon l. Daprè sa enstitisyon polisyè a di, jèn gason 18 lane a se ta chofè gang «Kokorat San Ras» yon gwoup bandi nan depatman Latibonit.
PNH la enfòme jodi vandredi 11 oktòb 2024 la, li arete Edson Arisma nan jou pase yo poutèt li ta nan gwoup gang sa k ap teworize popilasyon an. Li fè konnen tou, se ajan fòs lòd yo nan depatman Latibonit ki rive mare sispèk la.
Daprè lapolis la, Edson Arisma se chofè Gerbens Tilus alyas Benjy, ki se dezyèm chèf gang «Kokorat San Ras» la. Nan moman odisyon l, endividi a ki se yon chofè taksi pa kache li se chofè baz bandi sa. Li deklare tou se li ki responsab pote lajan bay pwòch chèf gang nan.
Pou kounye a, Edson Arisma nan gadavi pou tout lòt pwosesis ki nesesè yo.
Atik sa se pwopriyete prive ©️ Gwoup Medya MAGHAITI 2024
