3 polisye SWAT blese ak bal jodi madi 27 dawout 2024 la, nan yon operasyon Polis Nasyonal la te tanmen nan zòn Bèlè. Se otorite yo nan lapolis la ki konfime nouvèl sa sou paj Fesbouk yo.
“Eta sante 3 ajan SWAT yo, ki blese lejèman nan kad operasyon Lapolis Nasyonal Ayiti (PNH) a te fè maten an nan katye Bèlè ak nan Solino, estab“, se sa PNH la ekri nan nòt sa ki fè konnen viktim yo deja ap pran swen ka yo nesesite.
Enstitisyon polisyè a pwofite bay kèk enfòmasyon sou entèvansyon yo te fè jodi a nan katye sa gang ak zam kontwole a. Li eksplike se plizyè inite espesyalize ak sipò yon pati Fòs Sekirite Miltinasyonal la ki te angaje yo nan operasyon sa. Se yon fason pou derasinen baz gang ki okipe zòn sa depi kèk tan.
Okazyon an te pou PNH la tou kote yo envite manm popilasyon an rete trankil pandan entèvansyon sa lapolis ap mennen an. Otorite yo asire operasyon yo fèt yon fason ki pwofesyonèl.
N ap soulinye, jouskounye a malgre yo bay chif polisye ki blese nan afwontman an, responsab yo poko bay okenn lòt enfòmasyon konsènan bandi ki ta mouri osnon blese nan operasyon an.
Atik sa se pwopriyete prive ©️ Gwoup Medya MAGHAITI 2024
