Nan yon pwen pou laprès jounen lendi 2 septanm 2024 la, lapolis anonse li gen 7 jou depi l ap mennen yon operasyon nan Bèlè, Solino, Fò Nasyonal ak Ba Dèlma. Pandan operasyon sa, plizyè bandi tonbe nan echanj kout bal ak ajan fòs lòd yo.
Polis Nasyonal Ayiti (PNH) a enfòme l ap mennen operasyon sa depi 27 dawout 2024 la. Yon operasyon ki fèt nan tèt ansanm ak Fòs Lame Ayiti (FAD’H) ak Misyon Sekirite ak Soutyen (MSS) an, daprè Michel-Ange Louis Jeune, pòt pawòl PNH la.
Komisè polis la fè konnen operasyon an poko fini, men eskplike yo ap fèt nan lide pou reprann zòn bandi yo kontwole depi anviwon 3 lane. Se yon fason tou pou garanti deplasman moun ak byen ki nan zòn sa yo.
Anplis, pòt pawòl PNH la di l rete kwè popilasyon an dwe konnen jiskounye a operasyon an sou bon wout li. Se pou sa li enfòme fòs lòd yo deja libere plizyè espas popilasyon an pa t gen aksè avè l.
Espas sa yo se nan Fò Nasyonal, Ba Dèlma kote sikilasyon ap reprann piti piti, e moun ak machin kapab sikile. Se konsa, Michel-Ange Louis Jeune fè konnen tou plizyè bandi ki te nan kachèt yo pandan yo t ap fè echanj kout bal ak lapolis te rive pèdi lavi yo.
Daprè pòt pawòl PNH la, bandi yo itilize plizyè espas pou fè kachèt yon fason pou mennen zak kriminèl yo. Epas sa yo, selon detay yo se espas piblik kou prive.
Malgre tout deklarasyon sa yo responsab la pa bay chif bandi ki tonbe nan kad operasyon yo, men soulinye yo sezi plizyè zam san l pa antre nan twòp detay. Pi lwen, mesye Louis Jeune di genyen plizyè arestasyon ki fèt pandan l gen polisye ki te rive blese tou.
Pou fini, pòt pawòl enstitisyon polisyè a raple kòmandman lapolis la rete detèmine sou angajman l pou l konbat zak bandi yo nan tout peyi a. Men se toujou nan tèt kole ak popilasyon an sa yo rele “maryaj polis, popilasyon an“.
Atik sa se pwopriyete prive ©️ Gwoup Medya MAGHAITI 2024
