Polis Nasyonal Ayiti a (PNH) anonse li arete ayè vandredi 8 novanm 2024 la, polisye Ernst Jacques ak madanm li Gloria Pierre pou trafik bal. Selon lapolis la, 2 moun sa yo ki nan enstitisyon polisyè a ap mache pran bal lapolis pou fè trafik pou rezon pèsonèl yo.
Selon detay lapolis la, moun sa yo jwenn arestasyon yo nan zòn Channmas. Men tout materyèl yo jwenn nan men polisye ajan 3 sa ak madanm li : 2 400 bal, ladan yo 1 400 se kalib 7.62, tandiske lòt 1000 la se kalib 5.56, zam pèsonèl polisye a ak yon chajè ki te gen 17 bal, yon fizi PTR ak 5 chajè kote youn te gen 20 bal kalib 7.62 plis 2 telefòn.
Pou sa ki konsène madanm polisye a, Gloria Pierre, responsab enstitisyon an fè konnen li ap travay nan Sèvis zam nan direksyon lojistik lapolis la. E selon deklarasyon mari li, madanm nan ta konplis nan pran bal lapolis pou bay polisye Ernst Jacques.
N ap soulinye, nan dat 30 oktòb pase a lapolis te rive arete tou polisye Jean Renel Pierre avèk 2 695 bal ak lòt materyèl nan men li. Ajan sa li menm t ap travay nan inite prezidansyèl ki rele Cat Team nan.
Atik sa se pwopriyete prive © Gwoup Medya MAGHAITI 2024
