Lapolis nan direksyon depatmantal Lwès 2 arete Stanley Midi, yon endividi ki ta fè tèt li pase pou polisye.
Endividi sa jwenn arestasyon l nan zòn Sonapi, jou ki te jedi 29 dawout pase a. Pandan jèn gason 31 lane a deklare li te nan 32yèm pwomosyon nan Polis Nasyonal Ayiti a (PNH), responsab yo nan Lekòl Nasyonal Polis la (ENP ) bò kote pa yo fè konnen yo pa t janm gen yon non konsa nan done yo. Epi dat li bay la pa t gen fòmasyon.
Stanley Midi pran kòd nan moman ajan fòs lòd yo t ap fè verifikasyon sou wout la. Sa rive akoz endividi an t al tante twonpe vijilans polisye yo lè l prezante tèt li kòm yon ajan polis.
Pou l jistifye li se polisye, endividi a fè konnen li te pran fòmasyon sòti mwa fevriye pou rive jen 2023 a. Daprè presizyon li, 32yèm pwomosyon li te ladan l lan te gen 4 seksyon men li di l te nan seksyon 7 la li menm.
Sispèk la pa sèlman fè tèt li pase pou polisye, men l gen yon matrikil l ap itilize ak yon nimewo seri ki pa valide.
Endividi sa ki gen plizyè lane depi l ap fè tèt li pase pou polisye nan odisyon l avwe li gen divès materyèl enstitisyon an nan men l. Li rakonte se yon zanmi l ki te polisye ki konn prete l yo.
N ap fè konnen sispèk sa ki jwenn arestasyon l jounen jodi a te rive menm twonpe vijilans manm nan fanmi l. Puiske li te toujou fè yokwè li se polisye depi kèk tan.
Atik sa se pwopriyete prive ©️ Gwoup Medya MAGHAITI 2024
