Yon jou aprè arestasyon l, Polis Nasyonal Ayiti a (PNH) resi bay rezon ki fè yo te arete ansyen depite Latibonit lan, Victor Prophane. Sèvis près ak relasyon piblik enstitisyon polisyè a fè konnen se pou asosiyasyon malfektè ak finansman gang nan peyi a ki fè lapolis met men sou ansyen palmantè a.
Nan detay Lapolis bay jodi lendi 13 janvye 2025 lan, yo site pawòl ansyen chèf gang Odma ki te akize pandan plizyè fwa ansyen palmantè a kòm moun ki nan tete lang avèk gwoup gang k ap simen latwoublay nan depatman Latibonit lan, sitou nan lokalite Savyen.
Pou kounye a, Victor Prophane ajan fòs lòd yo mete anba kòd depi ayè dimanch lan twouve l pou nan Direksyon Santral Polis Jidisyè (DCPJ).
Daprè sa Lapolis la fè konprann, arestasyon mesye Prophane nan vini aprè yon operasyon DCPJ te tanmen sou li sou lòd direktè jeneral lan, Rameau Normil. An menm tan, jounal anliy Passion Info Plus ki site pòt pawòl adjwen PNH lan, Lionel Lazarre, rapòte genyen 20 lòt moun Lapolis te rive arete tou nan menm moman yo t al pran ansyen depite a lakay li a.
N ap raple, Victor Prophane te deja tonbe anba sanksyon Konsèy sekirite Nasyonzini, Etazini ak Kanada poutèt yo jwenn li patisipe epi sipòte gwoup gang yo k ap teworize popilasyon an. Aprè arestasyon sa a, otorite nan enstitisyon sa pwomèt y ap mare tout moun ki patisipe nan zak kriminèl bandi yo ap fè nan peyi a.
Atik sa se pwopriyete prive ©️ Gwoup Medya MAGHAITI 2025
