Nan yon bilan li bay sou divès operasyon lapolis mennen nan peyi a, Pòt pawòl adjwen PNH la, Lionel Lazarre fè konnen yo sezi 13 zam ak plizyè bal nan Ba Dèlma. Anplis sa, lapolis la ak fòs etranjè a rive pran kontwòl epi mete baz yo nan lokal Enspeksyon Jeneral Polis Nasyonal Ayiti a (IGPNH) ki depi lontan te sou kontwòl gang yo nan Dèlma 2.
Mete sou 13 zam lapolis sezi, Lionel Lazarre di yo sezi tou plizyè bal, 3 dwon, 7 machin ak 3 moto epi yon bon valè dwòg ki ta marigwana.
Yon lòt kote, Misyon Miltinasyonal la anonse nan tèt kole ak lapolis la yo rive pran kontwòl epi rive tabli baz yo nan lokal Enspeksyon Jeneral Polis Nasyonal Ayiti a (IGPNH) nan Dèlma 2. Pandantan sa, yo anonse yo pral itilize lokal sa pou kapab aji vit nan lòt entèvansyon yo pral gen pou fè nan zòn sansib yo, e yo pwomèt y ap fè kou yo konnen pou tabli sekirite pou popilasyon an.
«Nou ankouraje abitan yo rete vijilan epi kontinye montre rezistans, jan yo te demontre detèminasyon yo pou kontinye ak lavi chak jou malgre difikilte sekirite yo sot pase», daprè sa responsab kominikasyon fòs la ekri.
N ap raple, pandan plizyè fwa chèf gang Viv ansanm nan moun konnen sou non Babekyou rive chape poul li nan afwontman ak lapolis. Operasyon nan baz gang sa ap fèt depi jedi 21 novanm 2024 la.
Atik sa se pwopriyete prive ©️ Gwoup Medya MAGHAITI 2024
