7 jou aprè Medsen San Fwontyè (MSF) te denonse antrav yo te koze nan laswenyay yon pasyan yo, Polis Nasyonal Ayiti a (PNH) di li pran nòt pou sa ki pase a. Nan sans sa, responsab polisyè yo di yo rekonèt bon jan travay òganis imanitè yo ap fè nan peyi a, san yo pa bliye eksplike tou nan ki sikonstans yo te rive kenbe anbilans sa pasyan an te twouve l la.
“PNH la vle soulinye pou tout moun ak tout òganis imanitè k ap travay nan domèn sanitè, nan kad fenomèn banditis la gang yo konn itilize kèk fwa kèk anbilans pou yo ka opere“, se sa nou li nan yon nòt responsab yo rann piblik jodi lendi 9 septanm 2024 la. Pi lwen, yo rakonte bandi yo konn nonsèlman pote akolit yo ki blese nan anbilans yo, men tou yo konn itilize machin sa yo pou yo fè move zak nan lari a.
Se pou tèt sa, yo fè konnen yo pran nòt sou sa ki pase a, e yo anonse yo te menm mennen ankèt sou lanmò pasyan an yon fason pou te kapab dekouvri verite sou dosye a.
N ap soulinye, se responsab MSF yo menm ki te sòti yon kominike madi 3 septanm pase a, kote yo te denonse lapolis dèske li te kenbe machin nan plis pase 1èdtan, alòske yo menm yo te genyen ijans. Selon yo menm, ajisman sa te kontribye anpil nan lanmò pasyan yo a, paske yo soulinye aprè kontwòl ajan PNH yo malad la pa t menm tann li te rive lopital pou l te rann dènye souf li.
“Lapolis te arete epi kenbe yon anbilans Medsen San Fwontyè (MSF) ki t ap transpòte yon pasyan ki te nan yon eta kritik, sa te anpeche ekip nou an ba li swen li te bezwen“, selon eksplikasyon yo te bay nan kominike a. Se sa ki fè, yo te mande pou tout aktè ki gen zam nan men yo respekte ekip medikal yo genyen yo pandan yo ap pèmèt pasyan yo jwenn swen pi rapid nan tout sekirite. Paske yo rete kwè bloke travay yo a se mete lavi moun an danje.
Nan bò pa PNH la, li di li rekonèt sa epi pwofite salye gwo travay enstitisyon imanitè yo, espesyalman MSF, ap fè nan peyi a. E yo pran egzanp lan sitou nan yon peryòd difisil nou ye a kote Ayiti ap fè fas kare ak yon gwo kriz sanitè sitou nan kan refijye yo.
Atik sa se pwopriyete prive ©️ Gwoup Medya MAGHAITI 2024
