2 resòtisan Nijeryan jwenn arestasyon yo nan Jakmèl ayè dimanch 18 dawout 2024 la. Se Polis Nasyonal Ayiti a (PNH) ki anonse nouvèl arestasyon 2 etranje yo nan depatman Sidès peyi a jounen lendi 19 dawout 2024 la.
Madukanze Kenneth ak Henry Peter se non 2 envidivi sa yo ki gen nasyonalite Nijeryèn fòs lòd yo mete anba kòd. Daprè enfòmasyon lapolis la pataje, tou 2 mesye sa yo t ap sèvi ak fo kat idantite ki gen nasyonalite Ayisyèn.
Nan detay PNH la bay, Madukanze Kenneth ki fèt nan dat 3 dawout 1993 nan peyi Nijerya sèvi nan peyi a sou non Augustin Jerry. Alòske Henry Peter, ki li menm fèt 7 fevriye 1995 toujou nan peyi Nijerya, sèvi ak yon fo kat idantifikasyon nasyonal nan non Junior Jean Pierre.
Otorite yo pwofite tou pou di yo kontinye kenbe angajman yo pou yo travay san pran souf. Pandan yo di y ap mete deyò nenpòt moun ki vle vyole lalwa peyi a epi deranje lòd piblik la.
Atik sa se pwopriyete prive ©️ Gwoup Medya MAGHAITI 2024
