Roudel Ducherne se non ansyen enspektè nan Direksyon Jeneral Enpo (DGI) ki jwenn kondanasyon l nan dat madi ki te 19 novanm 2024 la pou l pase 4 lane nan prizon. Selon Inite Lit Kont Koripsyon (ULCC), ansyen fonksyonè leta sa jwenn santans li aprè yo te jwenn men li tranpe nan koripsyon.
«Inite Lit Kont Koripsyon (ULCC) fè piblik la ak laprès konnen Tribinal kriminèl nan jiridiksyon Ench kondane 19 novanm 2024 la, enspektè nan Direksyon Jeneral Enpo (DGI) nan vil Ench, Roudel Ducherne pou pase 4 lane nan prizon pou detounman byen piblik», se sa estrikti a anonse nan yon nòt yo pibliye jodi lendi 25 novanm 2024 la.
Pi lwen, ULCC fè konnen arestasyon ansyen kad nan bwàt leta a te vini aprè bon jan ankèt yo menm yo te mennen sou li. Yo fè kwè, se efektivman nan menm moman sa yo te rive kenbe enspektè a nan move zak koripsyon li te konn fè yo.
Anplis kondanasyon Roudel Ducherne, Tribinal ki pwononse santans li a mande tou pou akize a remèt tout lajan li konnen li te vòlè pou peyi a nan DGI a.
Nan menm nòt sa, ULCC raple se 2yèm jijman ki fèt pandan 20 dènye ane sa yo sitou aprè kondanasyon ansyen direktè jeneral Ofis Asirans Machin Kont Tyè (OAVCT), Edric Léandre. Se sa ki fè, yo pwofite mande pou lajistis nan peyi a panche sou divès dosye ki ap tann depi lontan yo yon fason pou kapab konbat koripsyon sou tout fòm nan administrasyon piblik la.
Atik sa se pwopriyete prive ©️ Gwoup Medya MAGHAITI 2024
