Jean Nego, ki genyen 28 lane, pèdi lavi l ayè vandredi premye novanm 2024 la, aprè l te fin resevwa yon kout kouto nan men madanm li, ki pote non Lafalaise Danecie.
Se yon aksyon ki pase nan lokalite Kalafon ki twouve l nan depatman Sidès peyi a. Viktim nan, Jean Nego ki pran kout kouto a t al rann dènye souf li sou kabann lopital Sen Michèl ki nan Jakmèl. Nan detay ki bay yo, divès moun fè konnen pa t gen bon lavi nan mitan Nego ak madanm li Danecie.
Zak vyolans konjigal sa ajoute sou plizyè lòt ki te plede fèt nan mwa septanm 2024 la. Pami yo n ap raple jèn gason ki te pote rele Léo ki te rive touye epi pase anba flanm dife menaj li, Mikaelle nan Leyogàn. Se yon bann ka ki pa sispann repete sou fanm tankou gason nan sosyete ayisyèn nan.
N ap fè remake, viktim nan mouri kite yon timoun ki pral genyen 2 lane. E li menm ak madanm li te sèlman genyen yon lane depi yo te marye.
Atik sa se pwopriyete prive ©️ Gwoup Medya MAGHAITI 2024
