Kou dapèl nan vil Ench te òganize yon odyans mèkredi ki te 27 novanm 2024 la, nan lide pou te tande moun ki ta enplike nan dosye lanmò jounalis Néhémie Joseph la. Odyans sa se premye odyans ki fèt aprè jij enstriksyon Edwige Dorsainvil te rann òdonans li 2 mas 2024 la.
Daprè avoka jounalis la, mèt Robinson Mazarin se yon odyans timoun piti ki te chaje ak fòs kote. Se pou sa, li fè remake pandan tout seyans lan manm kou dapèl yo pa t konn kòman pou yo te kòmanse, yo pa t tande tout akize yo, sila yo yo te rive tande yo, kesyon yo pa t pètinan ditou. Avoka a jije tout sa yo pèmèt li konsidere jij yo pa t konsilte dosye a.
Si nan òdonans jij Edwige Dorsainvil la li te jwenn anpil chaj kont ansyen senatè Rony Célestin ak majistra Mibalè a, Lochard Laguerre. Enbyen moun sa yo nan temwanyaj yo bay douvan kou dapèl la, di yo pa konn anyen sou lanmò pwofesyonèl laprès la.
Kontrèman ak jij Dorsaivil ki te di li pa t jwenn anyen kont jounalis Garry Pierre Paul Charles, komisè gouvènman vil Ench lan li menm, mèt Friztnel Hector mande pou kou dapèl tande l ak tou sitwayen ki rele Hugens Charles ak Lenel la.
Fòk nou di, aprè plis pase 5 lane nan mawon, kote li menm gen manda dèyè l, Elionel Casséus te resi parèt pou otorite yo kapab wè l. Malgre sa, akize a ki se ansyen majistra vil Mibalè a sòti lib. Poutan genyen Yolette Jeanty ak Garry Pierre Paul Charles majistra a di li pa jwenn anyen kont yo.
Jouskounye a nan 8 moun jij enstriksyon an te voye jije douvan tribinal kriminèl an prezans jiri yo genyen yon bò Juste Chandou Clerjeune ki deja nan prizon. Angelina Fabiola Cameau li menm nan mawon, Elionel Casséus sòti nan mawon, poutan li poko janm jwenn arestasyon l. Epi nan yon lòt bò, genyen Rony Célestin, Lochard Laguerre, ki plede yo pa konn anyen anplisDouyon Rosevald, Lenel A.C epi Huguens Charles ki yo menm poko pale ditou.
Pou moun ki te reprezante kou dapèl la nou jwenn : Prezidan Marie Mercie Destorel Jean-Baptiste, jij Sorel Dumornay, epi Berge O. Surpris. Alòske, pou ministè piblik la se te avoka sa yo : Fritznel Hector, Pélinos Mompremier, Walner Joseph, David Joseph ak Prudent Ortella, ki se youn aprè lòt komisè gouvènman ak ranplasan.
N ap raple pwofesyonèl laprès la, Néhémie Joseph te asasinen nan dat 10 oktòb 2019. Kote yo te jwenn kò viktim nan, nan kòf machin li ak plizyè mak bal nan pak Bayàs ki chita kò li nan antre vil Mibalè.
Atik sa se pwopriyete prive ©️ Gwoup Medya MAGHAITI 2024
