Sant Lidèchip Entènasyonal atravè Yale University nonmen 9 septanm 2024 la, Laurent Saint-Cyr, youn nan konseye prezidansyèl ayisyen yo, kòm premye Yale Peace Fellow nan inivèsite ameriken an. Daprè konseye li Ricardo Germain, Yale Peace Fellow se yon pwogram ki la nan objektif pou jwenn solisyon ak konfli entènasyonal yo.
“Laurent se premye peace fellows nou, e nou pa te ka pa espere yon pi bon moun pou n ta kòmanse ak pwogram sa”, daprè deklarasyon direktè fondatè pwogram nan, Rob Malley. Nan bò pa konsène a, konseye li Ricardo Germain, fè tout moun konnen aktyèlman konseye prezidansyèl la ap patisipe nan inogirasyon pwojè sa.
Nan detay mesye Germain bay yo, li fè konprann patisipasyon Laurent Sain-Cyr nan pwojè sa ap benefik pou peyi a. Se pou sa, nan deklarasyon li yo, li di konseye Saint-Cyr angaje l pou l soutni gwo rechèch k ap fèt sou kriz ayisyen an pandan l ap mete disponib eksperyans li ak konpreyansyon l sou dosye a.
Mete sou dosye sa, konseye mesye Saint-Cyr la fè konnen chèf li gen pou objektif tou pou bay kout men ak tout demach ki vize konbat vyolans ki an Ayiti a, epi mete men ak sa yo ki angaje yo pou pran chimen lapè, estabilite ak devlopman sosyo ekonomik yo.
N ap fè konnen selon yon atik Sant Lidèchip Entènasyonal te pibliye 9 septanm pase a, Laurent Saint-Cyr ak moun ki jwenn bous pou pwogram sa ap gen pou yo fè bon tan nan Inivèsite a. Kote yo pral pataje konesans epi kontribye nan solisyon pwoblèm konfli yo, epi suiv bon jan fòmasyon. Yo soulinye bous sa bay nan tèt kole ak Inter Mediate yon òganizasyon k ap travay pou kenbe lapè ak bay konsèy nan sa k gen pou wè ak fè pon epi bay soutyen nan pwosesis mete lapè nan tout mond lan.
Atik sa se pwopriyete prive ©️ Gwoup Medya MAGHAITI 2024
