2 jou aprè ansasinay direktè rejyonal nan depatman Nò Ofis Nasyonal Migrasyon (ONM) an, Kerwin Augustin, Konsèy Prezidansyèl Tranzisyon (KPT) an di l kwè li se yon nesesite pou otorite ki la pou sa yo mennen prese prese yon ankèt. Nan demach sa, KPT a estime asasen Kerwin Augustin yo ap ka ale devan lajistis.
Nan yon nòt li pibliye sou kont Twitè Laprezidans jodi vandredi 20 septanm 2024 la, Konsèy prezidansyèl tranzisyon an di li aprann nouvèl asasinay Kerwin Augustin avèk anpil endiyasyon.
«Zak vyolans sa yo nou pa dwe aksepte yo, yo montre nan ki nivo ensekirite a menase peyi nou», se sa KPT a ekri nan nòt sila pandan l soulinye disparisyon direktè ONM Nò a kite yon gwo vid nan Ofis lan ak nan depatman an.
Pi lwen, KPT a di li kwè nou dwe mete fòs nou ansanm yon fason pou n kapab fè fas ak kriz sekiritè a k ap peze kou sosyete a. Paske selon yo menm nou paka kite vyolans ap dikte avni peyi a.
Nan sans sa, Konsèy Tranzisyon an mande pou tout moun mete vwa yo epi aji ansanm yon fason pou gen yon Ayiti kote chak moun ap ka viv nan tout sekirite.
N ap raple, direktè rejyonal ONM nan Kerwin Augustin te jwenn lanmò l 19 septanm pase a sou kabann lopital «Universitaire Justinien» nan Okap aprè bandi ak zam te fin atake l devan pòt lakay li.
Atik sa se pwopriyete prive ©️ Gwoup Medya MAGHAITI 2024
