Nan yon kominike yo rann piblik nan lannuit lendi 23 desanm 2024 la, Konsèy Prezidansyèl Tranzisyon an (KPT) mande otorite yo fè sa yo konnen pou mete lòd nan fason moun yo ap konstui nan peyi a. Rekòmandasyon sa vini nan yon moman kote moun pa sispann mouri akoz deboulonnay tè nan divès vil nan peyi a.
« Fas ak trajedi sa yo ki toujou ap repete a, Konsèy la mande otorite lokal ak nasyonal yo pou rete fèm nan desizyon pou regile zafè konstriksyon yo e gen yon pi bon jesyon amenajman teritwa a. Se sa ki ap rann kominote yo mwens fèb fas ak katastwòf natirèl yo », daprè sa ki ekri nan kominike sa ki gen pou wè ak inondasyon ak deboulonnay tè ki genyen nan vil Pòdepè akoz gwo lapli ki genyen.
Paralèlman, prezidan Konsèy la, Leslie Voltaire te mennen ayè lendi a yon rankont ant li menm, 9 minis nan gouvènman an, direktè depatmantal yo, reprezantan sektè prive a ak meri Okap la. Rankont sa ki te gen objektif evalye defi yo epi jwenn solisyon pou devlopman vil sa, fèt kèk jou aprè 2yèm vil peyi a li menm tou te anba dlo, pandan fenomèn meteyowolojik Fwon Fwa a ap pase an Ayiti.
Nan menm sans sa, KPT a pwofite voye solidarite l bay tout viktim yo, sitou sila yo ki pèdi yon moun nan dram sa ki pase Pòdepè a.
N ap raple, sòti 30 novanm rive ayè 23 desanm nan, Fwon Fwa a rive afekte plizyè vil nan peyi a tankou jeremi, Okap ak Pòdepè. Nan Jeremi, genyen 3 moun ki pèdi lavi yo, 13 blese, 3 lòt disparèt pandan 60 moun oblije kite kay yo. Nan Okap, yon timoun te pèdi lavi l, e otorite yo te dekrete eta ijans 2 jou aprè lapli te fè gen gwo inondasyon nan plizyè zòn nan vil la. Nan Pòdepè, bilan pasyèl yo fè kwè genyen 5 moun ki mouri, plizyè kay kraze e vil la inonde ak dlo sa ki fè gen anpil labou.
Atik sa se pwopriyete prive © Gwoup Medya MAGHAITI 2024
