Nan yon kominike li rann piblik jodi madi 12 novanm 2024 la, Konsèy Prezidansyèl Tranzisyon an (KPT) di li kondane ak tout fòs li vyolans ki ap monte nan peyi a pandan 2 dènye jou sa yo. Nan sans sa, li pwomèt pou trennen devan lajistis tout otè zak sa yo ki lakoz ayewopò entènasyonal Tousen Louvèti a menm rive fèmen pòt li.
«Fidèl ak valè e prensip nou, Konsèy Prezidansyèl Tranzisyon an kondane ak tout fòs li vyolans sa k ap monte nan rejyon metwopolitèn nan», daprè sa nou li nan kominike sa. Li soulinye tou, atak nèg ak zam yo fè sou popilasyon an nan divès zòn epi avyon Spirit Airlines ki te resevwa plizyè bal toupre Ayewopò a ayè lendi 11 novanm nan.
Pou bay yon repons ak zak teyoris bandi ak zam yo, Konsèy la fè konnen l ap trennen devan lajistis tout otè move zak sa yo nan peyi a. Nan sans sa, li anonse Fòs lame Ayiti a (FAD’H), Polis Nasyonal Ayiti la (PNH), ak tout fòs Miltinasyonal la (MMSS) deja deplwaye nan zòn Ayewopò a, nan lide pou sekirize moun k ap viv nan anviwon yo, epi asire pwoteksyon vòl komèsyal yo.
Yon lòt kote, Ministè lajistis ak Sekirite Piblik (MJSP) kondane tou zak sa yo an Ayiti. E mande pou fòs sekirite nasyonal yo pran tout dispozisyon pou tabli sekirite nan peyi a. Pandantan sa, minis sòtan an, Carlos Hercule fè konprann komisè gouvènman Kwadèboukè a deja resevwa lòd pou mare tout kriminèl ki te fè zak sa sou avyon yo ayè lendi 11 novanm nan.
N ap soulinye, Administrasyon Federal Aviyasyon (FAA) entèdi kèlkeswa vòl ayeryen an an Ayiti. Desizyon sa pran jodi madi 12 novanm 2024 la aprè avyon Spirit Airlines ak Jetblue te resevwa bal pandan yo ta pral ateri nan ayewopò a. Entèdiksyon sa sou Ayiti pou pi piti 30 jou.
Atik sa se pwopriyete prive ©️ Gwoup Medya MAGHAITI 2024
