Nan yon kominike yo pibliye ayè madi 29 avril 2025 lan, Konsèy Prezidansyèl Tranzisyon an (KPT) demanti chif Rezo Nasyonal K ap Defann Dwa Moun yo (RNDDH) bay sou lajan yo ta koute trezò piblik la. Laprezidans fè konnen nonsèlman chif yo pa egzat, men gen nan yo òganis lan ta ajoute sou yo, pandan gen lòt yo di ki pa menm egziste jan yo vle fè konprann li a.
«KPT a sezi wè yon rapò Òganizasyon RNDDH sòti sou fonksyonman Prezidans la, KPT a pote yon demanti fòmèl ak sa ki di nan rapò sa a. Chif ki avanse yo pa egzat. Genyen yo gonfle e kèk ladan yo kareman fo, pa egziste ditou», daprè sa yo ekri nan kominike sa a.
Selon sa yo fè konprann, RNDDH ta pran nan move sous, e rete kwè se erè yo fè nan divès chif yo te pibliye yo. Se pou sa, yo defann tèt yo pou di bidjè KPT a ki gen 9 manm kounye a pa koute plis kòb pase lè te konn gen yon sèl prezidan nan peyi a.
Kontrèman ak Rezo a ki te detaye pou di yon grenn konseye koute trezò piblik la 13 milyon goud pandan yon mwa san lòt depans pa ladan l, ebyen laprezidans pito chita sou ponderasyon pou kontrekare yo. Men konparezon yo fè sou bidjè pase yo: ansyen prezidan Michel Martelly te koute 2,2 % nan lane 2014-2015, epi 1,5% nan lane 2015-2016, Jocelerme Privert te koute 1,7 % nan lane 2016-2017, Jovenel Moïse sòti 2017 rive 2021 li te depanse o total 6,3%, Ariel Henry te koute 2,3% sòti 2021 pou rive 2023. Ofinal, genyen Ariel ak KPT a ki te koute 1,3% nan lane 2023-2024, epi genyen KPT a poukont li ki koute 1,7% sòti 2024 rive ane 2025 la.
Konsèy Prezidansyèl la di li rete kwè moman twoub pèp ayisyen an ye a rapò sa ki gen move chif la plis anvlimen sitiyasyon an. Nan sans sa, li konseye tout òganis ki bezwen enfòmasyon pou pase nan sekretarya laprezidans la yon fason pou yo kapab jwenn bon jan enfòmasyon sou fonksyonman yo.
N ap soulinye, nan rapò RNDDH te pibliye vandredi 25 avril 2025 lan, yo te revele yon konseye koute trezò piblik lan 13 500 000 goud chak mwa. Yon lòt kote, yo di yo jwenn yo chak la touche 93 500 000 goud, sa ki fè yon total 1 122 000 000 goud sou tout yon ane. Pou sa ki gen pou wè ak lòt depans yo, òganis la soulinye 9 gwo tèt yo jwenn yo chak la 3 500 000 goud kòm lajan manje. Epi pou peryòd fèt sitou pou Pak la, yo te leve ant 3 milyon ak 5 milyon goud, yon chif laprezidans di ki pa egziste.
Atik sa se pwopriyete prive ©️ Gwoup Medya MAGHAITI 2025
