Nan yon nòt ofisyèl li pibliye ayè mèkredi 18 septanm 2024 la Konsèy Prezidansyèl Tranzisyon (KPT) an fè konnen li bay otorite konpetan yo lòd pou yo trennen lajistis tout moun ki konplis nan zak ansasinay ki te fèt sou mèt Artiste Rémy, nan lannwit 16 septanm pase a.
Manm KPT pa rete endiferan fas ak zak ansasinay sa ki fèt sou sekretè jeneral Bawo Fòlibète a, Artiste Rémy. Nan sans sa, nan nòt yo sòti a yo eksprime lapèn yo sitou lè yo te aprann atak fiziyad sa ki lakoz avoka a pèdi lavi l la.
Yon lòt kote, KPT a di l kondane zak vyolans ekstrèm sa kont pitit tè a epi anonse bò kote pa yo yo pran mezi pou tout kriminèl yo pran prizon.
Se nan sousi pou mete popilasyon an an konfyans ak pou l afime angajman Leta nan defans valè yon sosyete ki gouvène pa lalwa, Konsèy prezidansyèl la di li pase otorite jidisyè yo lòd pou trennen devan lajistis asasen mèt Artiste yo.
Nan menm dosye sa, madi ki te 17 septanm nan lapolis nan Nòdès te rive arete plizyè endividi ki ta gen enplikasyon yo nan lanmò sa.
N ap raple, sekretè jeneral Bawo Fòlibètè a te pèdi lavi lendi ki te 16 septanm pase a aprè bandi ak zam nan Wanament te fin tire sou li devan lakay li, nan lokalite Mankèt.
Atik sa se pwopriyete prive ©️ Gwoup Medya MAGHAITI 2024
