Ògan Egzekitif Konsèy Nasyonal Telekominikasyon (KONATEL) mande jodi vandredi 22 novanm 2024 la pou emisyon «Boukante la Pawòl» sispann byen vit sou Radyo Méga FM. Yo fè demann sa paske yo fè konprann emisyon sa depi kèk jou nan fè pwopagann pou bandi.
«Nan kad eta ijans gouvènman an pran epi pou sekirite nasyonal la, KONATEL mande w pou w sispann prese prese emisyon sa menm jan atik 130 ak 135 dekrè a di l la», daprè sa ki ekri nan yon lèt responsab telekominikasyon nan peyi a voye bay direktè Radyo sa a, Alex Saint-Surin.
Pou eksplike dezisyon sa a yo kontinye pou di : «Direksyon jeneral Ògan Egzekitif Konsèy Nasyonal Telekominikasyon (KONATEL) konstate depi kèk jou frekans 103.7 MHz leta ba nou an ap itilize nan fè gwo pwopagann anfavè gwoup ame yo ki ap simen laperèz nan kapital la».
Yo soulinye tou pandan plizyè fwa nan emisyon «Boukante la Pawòl» chèf gang Kanaran an, Jeff Gwo lwa ak Jimmy Chérizier alyas Babekyou plede pale sou antèn Radyo sa pou menase popilasyon an. Se yon bann ajisman, selon yo ki vyole lalwa peyi a espesyalman atik 51, 52 dekrè 12 oktòb 1997 la ki bay leta tout dwa sou sèvis telekominikasyon an Ayiti.
Si sa pa fèt jan KONATEL mande sa, responsab yo menase pou fèmen Radyo a, menm jan lalwa mande sa.
Atik sa se pwopriyete prive ©️ Gwoup Medya MAGHAITI 2024
