Nan lide pou fè konnen misyon yo epi ede nan travay sansibilizasyon ki dwe fèt nan peyi a, Komite Entènasyonal Kwawouj (CICR) te òganize jodi madi 24 septanm 2024 la, yon seyans fòmasyon pou jounalis yo. Pandan jounen sa, plizyè kad nan òganis lan te pale sou enpòtans pwoteksyon misyon medikal la genyen pou yo e kòman aktè nan sosyete a ta dwe respekte sa yon fason pou pa antrave aksyon yo ap fè nan peyi a.
Pou te demare jounen an, responsab yo te pase pou piblik la yon videyo ki te pale sou istwa kreyasyon lide sa, ki vin tounen mouvman, ak Henry Dunand nan lane 1863. Aprèsa, yo te pwofite pale sou 3 anblèm CICR yo ki la pou pwoteksyon ajan yo epi ede yo nan tout mond lan idantifye kilès yo ye.
Imanite, enpasyalite, netralite, endepandans, volontarya, Inite ak inivèsalite, se tout sa yo responsab kominikasyon òganis lan, James Peterson Joachim te soulinye nan sa ki gen pou wè ak prensip fondamantal lakwawouj. Pou te kontinye, li te defini misyon ak aksyon yo fè an Ayiti. Nan misyon yo genyen nou jwenn aspè imanitè a, ede viktim katastwòf natirèl nan peyi a, bay premye swen sante yo elatriye.
Pou sa ki konsène aksyon yo poze yo keseswa chèf kominikasyon yo a oubyen chèf operasyon an, Koné Yssouf pa t bliye presize yo fè prevansyon, pwoteje moun yo, ba yo asistans medikal epi kopere ak kèk patnè tankou lakwawouj ayisyèn ak lòt ankò. Yon lòt kote, yo te pale tou sou vyolans seksyèl ak tout konsekans li kapab genyen pou ni viktim nan ki kadejakè a. Pou aksyon yo poze nan ka sa yo, Vilbruna Alexandre Dieuveille te fè konnen CICR fè suivi pou viktim yo pou jwenn aksè ak swen medikal epi te pale sou fòmasyon ki fèt pou kominote yo epi posiblite pou yo mete sou pye yon pwogram psikososyàl pou viktim vyòl yo.
Se poutèt sa, yo fè tout moun konnen pou ede kèk lopital tankou Lopital lapè, Bernard Mevs, Medsen San Fwontyè, Sent Kamiy yo te fè don 17 kit chirijikal, 7 lòt kit pansman, ak 12 sak premye sekou pandan ane 2024 la. Nan kan deplase yo menm, yo mansyone gen plis pase 55 000 moun ki te rive jwenn dlo pou yo sèvi, anviwon 10 000 lòt te jwenn kit ijyènik ak lanpadè. Pou kan refijye yo, yo di gen 6 kabin pou lave men yo mete disponib epi yo fè kanpay asenisman nan divès zòn pami yo Bwouklin nan Site Solèy.
Pou fòmasyon yo bay deja yo, responsab yo fè kwè deja gen 58 moun ki pran fòmasyon nan premye sekou, 58 lòt fòme nan sa ki gen pou wè ak vyolans. Tandiske, pou sa ki gen pou wè ak sansibilizasyon yo yo soulinye yo reyalize 102 sesyon deja e prevwa ranfòse l plis toujou nan lane 2025 k ap vini la.
Nan sousi pou konprann kòman Komite Entènasyonal kwawouj atravè divès patnè l yo toujou prezan nan kèk zòn ki sou kontwòl bandi yo, yo te deklare pou eksplike : «Toujou gen dyalòg ant yo menm ak otorite yo, lapolis, gwoup gang yo yon fason pou garanti sèvis esansyèl yo nan zòn yo».
Pou te fini ak seyans fòmasyon an, Yvon Leclerc ak Jacob Charles ki ap travay pou lakwawouj ayisyèn te pale sou antite sa. E te pwofite bay detay sou lakwawouj ayisyèn ki prezan nan tout peyi a espesyalman nan 14 rejyon. kote yo gen 115 lokal yo estab epi 10 000 volontè k ap travay pou kontinye ak èd imanitè yo, epi pwoteje moun yo.
© Tous droits réservés – Groupe Média MAGHAITI 2024
