Aprè jounen kout bal komin Akayè te konnen ayè lendi 21 oktòb 2024 la, sitiyasyon an pa chanje jodi madi 22 oktòb la. Bandi nan gwoup Izo ak Kanaran toujou ap tante pou pran kontwòl zòn sa.
Popilasyon Akayè a li menm kontinye ap lanse SOS pou mande Polis Nasyonal Ayiti a (PNH) ranfòse sekirite l. Sitou aprè bandi yo nan kowalisyon Viv ansanm te atake yo sou lanmè ak atè depi ayè lendi an.
Daprè divès abitan, Lapolis poko janm pote yo sekou anba atak gwoup gang sa yo. Yo fè konnen tou, se ak anpil difikilte pou yo rive pale ak yon fanmi akoz sinyal ki pa genyen nan site drapo a.
Menm jan kout bal ap chante nan komin Akayè, maten madi an genyen plizyè zòn nan kapital la bal pa sispann tire. Nou ka site komin Taba kote ki malgre PNH la te anonse li ranfòse prezans li, kontinye ap fè fas ak vyolans gang yo.
Atik sa se pwopriyete prive ©️ Gwoup Medya MAGHAITI 2024
