Nan yon kontèks kote otorite dominiken yo ap voye tounen plizyè Ayisyen an Ayiti, Dominiken yo yo menm pa pran tan pou eksprime enkyetid yo sou konsekans ekonomik yo. Se nan sans, plizyè komèsan dominiken sinyale mache fwontalye a gen gwo menas defisi sou li, daprè Listín Diario.
«M pa dakò pou yo fèmen pòtay la», se deklarasyon youn nan machann yo, César Espinoza jounal dominiken an rapòte. Mete sou sa, yo ajoute pawòl Eddy Burgos ki, li menm tou se komèsan, pa mete dlo nan bouch li pou fè konprann nan jou k ap vini yo dominiken ka fè gwo defisi. Puiske li fè konprann Ayisyen yo nan Wanament menase pou fèmen fwontyè binasyonal la espesyalman nan bò pa Ayiti a.
Pou sa ki konsène Ayisyen yo ki ta vle manifeste pou montre fason yo pa dakò ak pil depòtasyon dominiken yo ap fè depi kòmansman mwa oktòb la, majistra Dajabón nan, Santiago Riverón di sa pap kapab pase konsa.
«Si modèl manifestasyon sa yo se nan Dajabón yo ap fèt, n ap bay yon repons kòm otorite, kòm dominiken e kòm patriyòt».
N ap fè konnen, se pa premye fwa sektè komès dominiken an ap fè fas ak lajan epi komès yo ki ap pèdi dèske Ayisyen deside fèmen pòtay la e sispann echanj komèsyal ant 2 peyi yo. Nan mwa oktòb 2023 a, menm sitiyasyon sa te repete kote pwodiktè ze nan Sendomeng te al manifeste ak ze pouri nan men yo. Plizyè lòt komèsan dominiken te pran lari nan jou ki te lendi 30 oktòb ane 2023 a, nan lide pou te manifeste kont gouvènman an ki te pran plizyè mezi kont Ayiti, akoz konstriksyon kanal la nan Wanament.
Atik sa se pwopriyete prive ©️ Gwoup Medya MAGHAITI 2024
