Yon notab nan Kanapevè lanse gwo alèt sou Kanapevè akoz menas gang ki pandje sou tèt zòn sa a. Daprè pawòl moun sa a deklare Mag Haiti, si popilasyon an pa pran responsabilite l fas ak sa k ap tann li an, avan lontan zòn nan ap nan gwo kouri.
Moun sa a denonse move konplo k ap fèt pou livre Kanapevè bay gwoup gang kriminèl Viv ansanm nan. Nan ti pale li fè ak ekip Mag Haiti a, li revele semèn pase a yon gwoup ki gen ladan l 3 endividi t al fè yon rezèvasyon nan yon otèl ki twouve l Bwavèna, nan lide pou t al fè yon fèt. Daprè presizyon li, se yon rezèvasyon ki te fèt sèlman pou 15 jèn gason.
Sous sa a ki pa t vle non l site fè konnen nan moman yo te fouye 3 endividi yo, yo jwenn yo tout gen menm kantite lajan nan valiz yo. Nan sans sa, pou atire atansyon popilasyon an plis li deklare li konprann se tout bon li wè yo pran nan konplo a. Mete sou sa, li soulinye abitan yo menm pa vle fè brigad epi mete siveyans sou enkoni yo sitou sila yo ki fenk vin abite nan zòn nan.
Sitwayen sa ki se youn nan moun k ap goumen pou anpeche bandi kontwole Kanapevè a, avèti manm popilasyon an y ap nan kouri akoz li estime pa gen moun k ap panse pou yo. Puiske, li eksplike gen yon otorite, li pa t vle revele idantite l, ki derefize fouye moun pou rezon politik. Se pou sa, li denonse atitid pwòp pitit zòn nan, tankou chofè moto ak pwopriyetè kay yo k ap ede gang vin pran kontwòl zòn nan pi byen.
Menas sa ki pandje sou tèt Kanapevè, Pako ak Tijo a se yon gwo enkyetid pou pèp Ayisyen an, paske avan bandi yo te anvayi Kenskòf te gen anpil alèt ki te lanse menm jan an tou. E jounen jodi a, nan komin sa òganizasyon dwa moun yo anrejistre pou pitit 150 moun ki deja mouri nan atak gang yo fè, e yo mete dife nan plis pase 100 kay deja.
Foto: Frédéric Alexis
Atik sa se pwopriyete prive © Gwoup Medya MAGHAITI 2025
