4 jou aprè l te fin pran fonksyon nan Vila Akèy la, kabinè ministeryèl Premye minis Alix Didier Fils-Aimé resi fòme. Nan nouvo gouvènman sa a, genyen 8 minis ki te nan administrasyon Garry Conille an ki toujou la, epi genyen 10 lòt ki apènn antre nan leta a ak tit minis.
Pou sa ki gen pou wè ak nouvo tèt yo nan yon bò nou jwenn : Paul Antoine Bien-aimé pral jere Ministè Enteryè ak Kolektivite Teritoryàl (MICT), Alfred Metellus pral nan Finans ak Ekonomi, Patrick Pelissier pral mennen Ministè Jistis ak Sekirite Piblik (MJSP), Jean Harvel Victor Jean Baptiste nan tèt Ministè Zafè Etranjè ak Kilt (MAEC), Dr Lorté Blema ap nan tèt Ministè Sante Piblik ak Popilasyon (MSPP).
Nan yon lòt bò, genyen Erick Dessources ki ap nan Ministè Touris, Jean Michel Moise ap nan Ministè Defans, Pedrica Saint-Jean li menm ap nan Ministè Kondisyon Fanm (MCFDF), Katia Verdier ap jere Ministè Ayisyen k ap viv lòtbò dlo yo (MHAVE) epi gen Patrick Delatour ki ap nan tèt Ministè lakilti ak Kominikasyon (MCC).
Nan bò sila yo ki te nan gouvènman an deja nou jwenn nan yon premye tan : Ketleen Florestal ki nan Ministè Planifikasyon ak Koperasyon Ekstèn (MPCE), Raphael Hosty nan Ministè Travo Piblik, Transpò ak Kominikasyon (TPTC), Vernet Joseph nan tèt Ministè Agrikilti, Resous Natirèl ak Devlopman Riral (MARNDR), James Monazard li menm sou tèt Ministè Komès ak Endistri.
Nan yon 2yèm tan genyen Moise Jean Pierre Fils ki nan tèt Ministè anviwonman, Georges Wilbert Franck nan Ministè Zafè Sosyàl (MAST), Lynn Octavius toujou minis Jenès ak Espò epi Augustin Antoine li menm rete nan tèt Ministè Edikasyon ak Fòmasyon Pwofesyonèl (MENFP).
Kòm sekretè Deta nan Kolektivite Teritoryàl, nouvo premye minis lan ak Prezidan Konsèy la, Leslie Voltaire nonmen Patrick Sully W. Joseph.
Atik sa se pwopriyete prive ©️ Gwoup Medya MAGHAITI 2024
